27-7-2010

دۆستایه‌تییه‌ درێژخایه‌نه‌که‌ ناوی ئه‌و کورته‌ فیلمه‌ میلۆدراما ئینگلیزیه‌یه‌ که‌ له‌ نوسین و ده‌رهێنانی (ئاوات نامیق ئاغا) یه‌ و به‌مزوانه‌ له‌ به‌ریتانیا وێنه‌ گرتنی ته‌واو کرا، تێیدا هه‌ریه‌ک له‌ خانمه‌ ئه‌کته‌ره‌سی ئۆستورالیایی (جۆدیئان ڕیچارد سه‌ن) و ئه‌کته‌ری ئینگلیز(ڕۆب تالبۆت) به‌شداری سه‌ره‌کی ده‌که‌ن.
ئه‌م میلۆدرامایه‌ چیرۆکی سێ ڕۆژی ژیانی ( کلۆوی براون)ی،ته‌مه‌ن ناوه‌نجی ئینگلیزه‌ که‌ به‌دوای پیاوێکدا ئه‌گه‌ڕێت له‌گه‌ڵیدا داسه‌کنێ.
ئیتر له‌ناو هه‌موو ئه‌و پیاوانه‌دا که‌ له‌سه‌ر ئه‌نته‌رنێت بۆ ئافره‌ت ده‌گه‌ڕێن کلۆوی گڕ گڕ به‌ (ئاندی چیپنهام) وه‌ ده‌گیرسێته‌وه‌ و بڕیار ده‌ده‌ن له‌ شارۆچکه‌یه‌کی سه‌ر ڕۆخی ده‌ریا پێک بگه‌ن و پشوی هه‌فته‌که‌ به‌ که‌ماڵی ئیسراحه‌ت پێکه‌وه‌ بگوزه‌رێنن، به‌ر له‌وه‌ی فیلمه‌که‌ به‌ شێوازێکی چاوه‌ڕواننه‌کراو کۆتایی بێت.
بۆ وێنه‌گرتنی ئه‌م فیلمه‌ چه‌ندین ناوچه‌ی جودا له‌ هه‌ریه‌ک له‌، ئیکنهام، کامدن، کامبه‌رساندس و ڕای هه‌ڵبژێردران. ده‌سته‌ی به‌رهه‌مهێنه‌رانی ئه‌م فیلمه‌ زۆرتر له‌ پانزه‌ که‌س بوون.که‌ له‌ناویاندا چه‌ند کوردێکی دانیشتوی به‌ریتانیای تێدان و ڕۆڵی گرنگیان دیتوه‌.
ئاوات عوسمان عه‌لی، به‌رهه‌مهێنه‌ر
سالار سه‌عید، یاریده‌ده‌ری به‌ڕێوه‌به‌ری به‌رهه‌م
ئاکۆ عه‌لی خان، ڤیدیۆکار و جێگه‌ دابینکار
ناسر ناسری جێگه‌ دابینکار
ڕێبوارمه‌جید، وێنه‌گریی فۆتۆگرافی

ئه‌م فیلمه‌ کۆمپانیای (4 که‌یس فیلمس) خاوه‌نداری ده‌کاو وا بڕیاره‌ که‌ بۆ مانگی ئۆکتۆبه‌ری ئه‌مساڵ ته‌واو ببێت و دواتر به‌شداری فێستیڤاڵه‌ نێوخۆیی و جیهانیه‌کان بکا.
ئاوات نامیق ئاغا، به‌ر له‌وه‌ی کوردستان به‌جێبهێڵێ چه‌ندین به‌رنامه‌ی بۆ ته‌له‌فزیۆنی کوردستان و گه‌لی کوردستان له‌سه‌ر کاره‌ساتی 9ی حوزه‌یرانی 1963 دروست کردوه‌. دواتر ده‌ ئه‌ڵقه‌ی به‌رنامه‌ی (ژیانه‌وه‌ی کوردستان)یشی بۆ ته‌له‌فزیۆنی گه‌لی کوردستان دروست کردوه‌.
ئاوات، ماوه‌ی 16 ساڵه‌، له‌ ده‌ری ووڵات ده‌ژی و نێزیکه‌ی ده‌ ساڵێکیش ده‌بێت له‌ به‌ریتانیا سه‌رگه‌رمی قاڵبونه‌ له‌ سینه‌مادا. له‌ ئێستادا چه‌ندین به‌رهه‌می به‌ده‌سته‌وه‌ن له‌ ناویاندا فیلمێکی درێژخایه‌نه،‌ که‌ ژیاننامه‌ی ڕاسته‌قینه‌ی شه‌هیدێکی کۆمه‌ڵه‌یه‌ و به‌تاسه‌وه‌ چاوه‌ڕوانی ئه‌و ڕۆژه‌ ده‌کا که‌ بتوانێ پێشکه‌شی تامه‌زرۆیانی خه‌باتی گه‌لی کورد و سینه‌مای ڕاسته‌قینه‌ی بکا.