16-6-2010
فیلمی سینەمایی "شوێنیێک بۆ یاری" لە دەرهێنانی "شەوکەت ئەمین کورکی" بەشداری لە 64مین خولی فیستیڤاڵی نێونەتەوەیی فیلمی "ئێدینبۆرگ" لە وڵاتی بەریتانیا دەکات.بە پێی راپۆڕتی راگەیاندنی گشتی کۆمپانیای "نارین فیلم" لە هەولێر، فیلمی سینەمایی "شوێنیێک بۆ یاری" (کیک ئاف) KICK OFF لە دەرهێنانی سینەماکاری کورد "شەوکەت ئەمین کورکی"، لە بەشی پێشبڕکێی "رووسێبود" Rosebud لە 64مین خولی فیستیڤاڵی نێونەتەوەیی فیلمی "ئێدینبۆرگ" Edinburgh لە وڵاتی بەریتانیا نمایش دەکرێت و لەگەڵ 35 فیلمی سینەمایی دیکە بۆ وەرگرتنی خەڵات لە رکابەریدا دەبێت.
فیستیڤاڵی فیلمی "ئێدینبۆرگ" یەکێکە لە بە تەمەنترین فیستیڤاڵەکانی سینەمایی کە هەموو ساڵێک لە رۆژانی 16 تا 27ی جوون لە شاری ئێدینبۆرگ بەڕێوەدەچێت.
لەم خولەی فیستیڤاڵدا بڕیاروایە رێوڕەسمی رێزگرتن لە "شۆن کانتری" ئەکتەری ناوداری هۆلیوودی بە بۆنەی 80هەمین ساڵیادی لە دایک بوونی بەڕێوەبچێت.
شەست و چوارەمین خولی فیستیڤاڵی نێونەتەوەیی فیلمی "ئێدینبۆرگ" ئەمڕۆ چوارشەممە 16ی حوزەیران بە نمایشکردنی فیلمی سینەمایی "تەردەست" لە دەرهێنانی "سیلڤین شومە" دەست پێدەکات و رۆژی 27ی حوزەیران بە دەستنیشان کردنی براوەکانی بەشە جۆراوجۆرەکانی فیستیڤاڵ، کۆتایی بە کارکانی خۆی دێنێت.

بەڕێوەبەرایەتی راگەیاندنی گشتی کۆمپانیای "نارین فیلم".